Sumrinu tekið í mót.

Við ákváðum hjónin að fagna sumri á veglegan hátt þetta árið. Splæsa á okkur auka frídegi á föstudaginn og bruna í sveitina. Aldrei slíku vant náðum við líklega að vera matvinnungar þessa helgina. Vorverkum í garðinum voru gerð góð skil, runnar klipptir og laufarusl hreinsað. Pabbi hafði tekið vel til hendinni í öspunum og sagað af nægan efnivið í ágætis brennu, sem verður geymdur fyrir Helga og aðra "brennuvarga" fram að næstu áramótum.  Í fjárhúsunum hafði fæðst nýtt líf, nokkur lömb komin sem yndislegt var að knúsa og kjassa. Andri naut sín til hins ýtrasta, fór í fjósið með Bjarna, lék sér við Túrbó, fór á fjórhjólið með Tóta og plataði afa í Rússaferð sem ávalt er toppur sveitaferðanna. Einhvern veginn er það alltaf svo eftir dvöl í sveitinni að maður kemur heim eins og nýr maður, amk. endurnærður, batteríin fullhlaðin og borgarstressið á bak og burt. Nú er bara að treina sér orkuna fram að næstu ferð.

Athugasemdir

[HP Foss, 22.4.2007 kl. 23:05]

Og fara bara fljótt aftur, fljótt aftur. Þetta er svo stutt