Í dagsins önn

Færsluflokkur: Bloggar

Hversdagurinn

Eftir ævintýri helgarinnar tekur hversdagsleg vinnuvikan við. Til að krydda hana eilítið reynir maður að segja öllum sem maður hittir sögur af færð og veðri á hálendinu og vella fram og aftur um hversu yndislegt það er að fara á fjöll. Með þessu nær maður að framlengja helgina eilítið og lifa lengur á minningunni en ella. Staðreyndin er sú að nú eru snjólög með mesta móti ef litið er til síðustu ára og því lag að skella sér til fjalla ef áhugi er á spóli og spræni í pissukeppni jeppanna.

Falin, fundin, fokin, fríð.

Fórum á föstudaginn til fjalla í leit að frið og ró og fjallasýn. Í fyrstu var hún falin en hún fannst svo fauk hún í hríðarkófi en birtist á ný svo fríð. Hún er fjallasýnin við Jökulheima og nágrenni. Friður og ró fannst að sjálfsögðu og þó lúin séu bein eftir langa ferð er sálin endurnærð og til í hvað sem er.

Fimmtudagur til fjár

Í dag sannaðist fyrir mér hið fornkveðna: þolinmæði þrautir vinnur allar. Ef maður bíður nógu lengi þá gerist eitthvað gott eins og t.d. þokkaleg auking á því sem maður ber úr bítum fyrir hið daglega strit. Til að fagna því var splæst í kínamat og ís og nú verður maður bara að fara að leggja sig og láta sig dreyma um hvernig maður ætlar að eyða hýrunni, lítill vandi verður það, maður getur t.d. fyllt Blazerinn af bensíni 40þ.kall þar!!!

Njálgur

Nú rennur etv. einhverjum í grun að ég ætli að setja á blað nokkrar línur um heimilisvin barnafjölskyldna njálginn, sjálfan Enterobius vermicularis en nei ég læt það vera. Ætla hins vegar að ræða um nokkuð skæðan bróðir hans Helgarfríus jeppatúralis sem hrjáir nú allt heimilisfólkið hér á bæ. Er fiðringurinn orðinn svo óstjórnlegur að vart verður hjá því komist að viðra út þessa óværu um helgina og halda til fjalla. Kláðinn hefur bara magnast við það að jeppinn er nú kominn í toppstand eftir nokkrar meðferðir hjá bóndanum, daginn tekið að lengja og svo er bara ágætis spá. Fyrir þá sem ekki þekkja til þessa vágests þá er hann ólæknanlegur og aðeins hægt að halda einkennunum niðri með því að trylla til fjalla með reglulegu millibili.

Glóandi bein - sýklalyf í sjónvarpinu

Ef vel er að gáð eru amerískir ofurþættir uppfullir af ýmsum fróðleik um sýklafræði. Gott dæmi um þetta eru CSI þættirnir. Hafa þeir m.a. fundið morðingja af því hann var með Pseudomonas sýkingu í blóðinu og ef einhver skyldi hafa gónt á þáttinn í gærkveldi þá kom það í ljós að hægt er að greina hvort einstaklingur taki sýklalyfið tetracyclin með því að athuga hvort beinin í honum glói í útfjólubláu ljósi. Nú er spurningin hvort hægt sé að nýta sér þennan fróðleik á einhvern hátt ég held að áfram verði bara best að spyrja sjúklingana um lyfjainntöku. Hvað haldið þið???

Sýklalyfið tetracycline

Nýjir sjúkdómar

Ekki er nú í frásögur færandi þó maður hafi skroppið á árshátið bílaumboðs nokkurs um helgina. Etið og drukkið á hefðbundinn hátt og hlustað á misgamla og misgóða brandara þeirra sem þora að stíga á stokk. Ef ekki hefði verið fyrir ágætis innlegg veislustjóra um nýja sjúkdóma hefði þetta verið frekar innantómt fyrir áhugasaman heilbrigðisstarfsmann eins og mig . Lýsti hann þar nýuppgötvuðum krankleikum manna sem áður hafa haft önnur heiti svo sem sú algenga athöfn að leysa vind flokkast nú sem ristilfráflæði ekki ólíkt því að ropa oft er oft merki um vélindabakflæði. Það að verða lágvaxinn er auðvitað sjúklegt og heitir hæðarskerðing. Brestur nú minnið að muna eftir öðru sem nefnt var en eitthvað rámar míg í að vera sver um miðbikið væri nefnt sem miðlæg útvíkkun og annar algengur kvilli karla einhverskonar framstæða á ákveðnum líkamsparti og geti nú hver í eyðurnar .

Sunnudagurinn var ósköp ljúfur sá sjaldgæfi atburður átti sér stað að við hjónin sváfum út enda afleggjarinn ekki heimavið. Sennilega býr maður að þessu alla vikuna og þarf ekki að leggja sig fyrr en um næstu helgi.

Stína

Borðað á Borginni

Í gærkveld var ég þess heiðurs aðnjótandi að vera boðið að borða á Borginni. Aldrei áður hafði ég sveitalubbinn orðið svo fræg að snæða á þessum margfræga stað sem að því er mér skilst hefur gegnið í gegnum nokkur misgóð tímabil. Ef þið vitið það ekki nú þegar virðist Borgin vera uppá sitt besta um þessar mundir amk. hvað varðar það sem þar er framreitt. Á ýmsu var smakkað, kengúrukjöt og dádýrakjöt, hrár lax með wasabi ís, salfiskur sem ég hef aldrei smakkað betri og dásamlegir dessertar tveir. Ef þið leitið að góðum stað fyrir galadinner er Borgin málið, hreint út sagt frábært.

Nú bíður maður bara eftir að annað nýtt sýklalyf komi á markaðinn og verði boðið á Borgina á ný.

Blogg í bundnu máli

Borgar sig að blogga í dag

best er kannski að bíða.

Setja frekar saman brag,

stöku eina fríða.

Framburðaræfing

Ég og sonur minn Andri Snær höfum verið að æfa okkur á að bera fram R sem mörgum hefur reynst erfitt um ævina. Æfing okkar felst í því að fara með eftirfarandi vísu sem við settum saman í sameininingu og oftar en ekki kallar fram bros á vör.

Tralli og trítill og trúðurinn stóri

tróðu sér í trukkinn og trylltu af stað

þá kom bangsi með berann bossann

og bar á þá bleikt og brúnt bólukrem.