Mál að linni - ritgerð og ræða tilbúin

Laugardagur til loka

að linni nú senn er mál

Saman nú skjölum moka

og sinni loks líkama og sál. (KJ 2007)

Enn er ritað - 3 dagar til kynningar

Fimmtudagur til fræðslu

fróðleik nú safnað hef gnótt.

Mjög mig vantar ígræðslu

minnis, svo muni það fljótt. (KJ 2007)

Enn eitt kvöldið við ritstörf - 4 dagar til ræðuhalda - skilum frestað til 5 maí.

Miðvikudagur til mikils

mótar nú fyrir skel.

Svo er að semja ræðu

sem sæma þarf verki vel. (KJ 2007).

Við ritgerðarsmíð - 5 dagar til skila.

Þriðjudagur til þrautar

þokast nú málin hratt.

Sést nú til beinnar brautar

en barðið er ennþá bratt. (KJ 2007)

 

Að loknum löngum og ströngum degi.

Mánudagur til mæðu

megi hann enda skjótt.

Skálda nú skamma ræðu

og skunda í bólið fljótt. (KJ 2007).

Sumrinu tekið í mót.

Við ákváðum hjónin að fagna sumri á veglegan hátt þetta árið. Splæsa á okkur auka frídegi á föstudaginn og bruna í sveitina. Aldrei slíku vant náðum við líklega að vera matvinnungar þessa helgina. Vorverkum í garðinum voru gerð góð skil, runnar klipptir og laufarusl hreinsað. Pabbi hafði tekið vel til hendinni í öspunum og sagað af nægan efnivið í ágætis brennu, sem verður geymdur fyrir Helga og aðra "brennuvarga" fram að næstu áramótum.  Í fjárhúsunum hafði fæðst nýtt líf, nokkur lömb komin sem yndislegt var að knúsa og kjassa. Andri naut sín til hins ýtrasta, fór í fjósið með Bjarna, lék sér við Túrbó, fór á fjórhjólið með Tóta og plataði afa í Rússaferð sem ávalt er toppur sveitaferðanna. Einhvern veginn er það alltaf svo eftir dvöl í sveitinni að maður kemur heim eins og nýr maður, amk. endurnærður, batteríin fullhlaðin og borgarstressið á bak og burt. Nú er bara að treina sér orkuna fram að næstu ferð.

Þynnka

Það kann nú einhver að halda að ég liggi í rauðvínsþynnku sbr. síðasta pistil fyrir helgi en svo er nú ekki. Ég datt hinsvegar í garðinn um helgina og einhver þynnka er í vöðvunum eftir það fyllerí. Hvur veit nema ég endi með þá í afvötnun hjá Þórunni frænku. Tóti datt í bílaviðgerðir og gaf Mussonum smá vorskveringu. Kom þá á daginn að bremsur og pústkerfi þurftu smá yfirhalningu og því hef ég lítið séð af karli í kvöld. Ljósið logar í skúrnum og litli Tóti kemur og gefur mér stöðuskýrslu öðru hvoru. Hvaðan ætli hann hafi þessi "bílskúrsgen" gæti að verið frá móðurafa sínum???

Lukkupotturinn

Haldið þið að ég hafi ekki bara dottið í rauðvínslukkupottinn, þennan mánaðarlega sem við höfum í léttvínsklúbbnum Votmúla. 6 dýrindis rauðvínsflöskur eru nú mínar og bíða afmeyjunar. Votmúli er núna á sínu 5 aldursári og ber aldurinn vel. Líkt og hjá vel reknum fyrirtækjum verður næsta árshátið og samhliða aðalfundur haldinn erlendis og hefur ferðin vinnuheitið safnaðarferð Votmúlakirkju og standa nú yfir mánaðarleg samskot til kirkjunnar í tilefni þess. Án efa verður þetta með líflegri safnaðarferðum sem farnar hafa verið

Eins og allir vita þá styrkir og gleður hóflega drukkið vín mannsins hjarta .... SKÁL.

Vorboðinn?

Þá eru páskarnir liðnir, mamma og pabbi farin aftur í sveitina og systir til Eyja. Nú þarf að snúa sig í gang á ný, rifja upp verkefnin sem maður var að sinna fyrir páska og taka til við þau þar sem frá var horfið. Í veðráttunni er tvískinnungsháttur mikill, í morgun vetrarkuldi og bylur en seinnipartinn sól og blíða. Inn um gluggann heyrist í fyrsta vorboðanum - börnin komin út að leika í garðinum og neita að koma inn að lúlla, yndislegt .

Nýjar víddir

Stöðugt fleygir tækninni fram og oftar en ekki okkur til hagræðis eða ánægjuauka. Ein af þessum nýjungum er ný þrívíddartækni í bíó sem nú er komin í 1 bíósal á landinu, 1 af 150 í heiminum segja fróðir menn. Öll familían (nema Pabbi,Mamma og Þórunn) skellti sér að sjá herlegheitin í gær. Efniviður myndarinnar varð nánast að aukaatriði við að fylgjast með hvernig þetta virkaði og maður lifandi mikið afskaplega var þetta nú smart. Persónurnar stukku útúr myndinni, fljúgandi hlutir sveifluðust í kringum mann og rigningin datt á nefið á manni. Einstök skemmtun sem væntanlega mun verða vinsæl í framtíðinni.